BERNEDOko IBILBIDEAK

Ega ibaiaren haranean (Kontserbazio Bereziko Eremu izendatua) zehar eta laborantza lursaile artean garamatzan ibilbide zirkular erraza da hau. Bernedo herritik abiatuta, A-126 errepidea zeharkatuko dugu, hilerriaren ondoan ateratzen den asfaltatutako bide bat hartzeko. Ega ibaiaren gaineko zubi bat igaro ondoren, ezkerrean agertzen den lehen partzela-bide hartuko dugu. Laster baso eder baten ertzetik ibiliko gara. Ibilbideak laborantza soroen artean desbideratzerik gabe jarraitzen du pixkanaka Bernedora itzultzeko. Iritsi aurretik Ega ibaia zeharkatuko dugu berriro.

Bernedoko erdigunetik abiatzen den ibilbide zirkular erraza, Angostina herrira eta Kantabria-Toloño mendilerroaren natur eremuko erkamezti eder batera hurbilduko gaituena. Bernedotik A-126 errepidea zeharkatuko dugu hilerriaren ondoan agertzen den asfaltatutako bidea hartzeko. Laborantza soroen artean ibiliz, Ega ibaiaren gaineko zubitxoa zeharkatuko dugu eta, ondoren, gure eskuinean agertzen den partzela-bidea hartuko dugu. Bide nagusitik aldendu gabe, gure ibilbideak erreka batzuk gurutzatuko ditu eta A-3136 errepidea zeharkatuko du Angostina herrira iritsi aurretik. Herri honetan atsedentxo bat hartu dezakegu eta Santa Coloma eliza kontenplatzeko aprobetxatu. Bernedo herrira itzuliko gara erkamezti eder baten itzalpean.

Bernedo herritik irtenda, Okongo ermitarantz doan bidea hartuko dugu. Baselizara iritsi baino lehen gure ezkerretara dagoen bide batetik desbideratuko gara Kantabria-Toloño mendilerroaren iparraldeko isurialdean dagoen baso dentsoaren barrena ibiltzeko. Basoaren itzal atseginaren azpian ibiliko gara igoera arin batean A-2126 errepidearekin topo egin arte, Bernedoko udal mugan dagoena. Errepide hau zeharkatuko dugu gure bidea jarraitzeko, eta orain jaitsiz, pixkanaka gure abiapuntura itzuliko gara.

Ibilbide zirkular zaila, ingurune ezberdinak zeharkatzen dituena, hala nola Kantabria-Toloño mendilerroko basoak, Jaundel mendiaren natur eremua, edo Ega ibaiko ibarrean dauden laborantza-lursailak. Honez gain, Izki Parke Naturaleko inguru ederrean sartuko gara. Ibilbide honetan udalerria osatzen duten hainbat herri bisitatu ahal izango ditugu: Villafría, Navarrete, Urturi, Quintana eta Angostina.