MARKINA-XEMEINgo IBILBIDEAK

Ibilbide erraza da, Nordic Walking praktikatzen hasi berri direnentzat aproposa. Markinako erdigunetik Patrokua jauregira eta Andra Mariaren elizara eramango ditugu gure urratsak. Eliza gure eskuinaldean utzita, futbol zelaira eramango gaituen bidexka bat hartuko dugu, beti ere belardi, laborantza soro eta baserrien arteko ingurune lasai batean barrena ibiliz. Bideak, BI-633 errepidean amaitzen dela dirudien arren, Beko Benta kaletik jarraitzen du metro batzuetan, eta gero eskuinera egingo du eta, orain bai BI-633 errepidea zeharkatuko dugu, bertan gure ezkerrerako lehen desbideratzea hartuko dugularik. Hurrengo bidegurutzean eskuinera doan bidea hartuko dugu, baso atsegin batean sartu eta Markinako erdigunera itzuliko gaituena.

 Ibilbide honek Markina-Xemeingo udalerriko paisaia osatzen duten haran txikietako batera hurbilduko gaitu. Markinako erdigunetik Patrokua jauregia eta Andre Maria eliza atzean utziko ditugu, futbol zelaiaren norabidean jarraitzeko. Zuzen jarraituko dugu, errepidearen bi aldeetan agertzen diren desbideratzeei kasurik egin gabe. Ibilbideak haranaren iparraldeko isurialdea inguratzen du baso baten itzalpean igoera arin batean. Eskuineko aldean Gurbiola baserrirako sarbide-pista utziko dugu, gure ibilbidearen erdira iristeko, non haranaren hondoa eta Ormaetxea baserri bakartiaren bista zoragarriak izango ditugularik. Gure bideari jarraituko diogu bailara inguratuz, eta laster konturatuko gara jaisten hasten garela, berriz ere Markinako erdigunera heltzeko.

Ibilbide honek Ubilla-Urberuagako herrigunera hurbiltzen gaitu, ezaguna batez ere XIX. Mendean eraiki zen ur termalen bainuetxeagatik. Ibilbidea iparralderantz doa futbol zelairantz. Kilometro bat zuzen jarraituko dugu desbideratu gabe eta, Gurbiola baserria baino lehen, gure ezkerrean agertzen den desbideratzea hartuko dugu. Artibai ibaiaren ertzetik eramango gaituen basoetan barrena pista batetik jarraituko dugu. Ibaia zeharkatu ostean, BI-633 errepidetik tartetxo bat egingo dugu, Ubilla-Urberuaga noranzkoan, eta beti ere kontu handiz. Handik metro gutxira gure eskuinaldean agertzen den lehen desbideratzea hartuko dugu. Artibai ibaia beste bitan zeharkatuko dugu, garai batean Ubilla-Urberuaga dorre izan zenaren hondakinetatik igaroz. Errepidearen eskuinaldean agertzen den bidea hartuko dugu, harrobia ezkerrean utzita. Geroago ezkerretara dagoen bigarren desbideratzea hartuko dugu, baso eta belardietatik ibiltzen jarraitzeko. Markinako herrira jaitsiko gara orain Atxondoa auzotik.

Ibilbidea Markinatik abiatzen da Artibai ibaiaren ibai-ibilguari jarraituz, Meabe auzoko Industrialderako norabidean. Laster Zeinka-Zearregi auzorantz eskuinaldean agertzen den saihesbidea hartuko dugu. Ia kilometro bat egin ondoren bidea utziko dugu baso trinko batean sartzen den mendi pista bat hartzeko. Goraka joango gara Orbero errekaren haraneko magaletako batetik. Harrobiaren parean, BI-3448 errepidea kontu handiz zeharkatuko dugu, 704 metroko altuera duen Urregara mendiaren magalera hurbiltzeko. Hemendik Zapola mendirantz jaisten hasiko gara, Igoz baserritik igaroz. 750 bat metro egin ondoren, gure eskuinera dagoen bide batetik hartuko dugu, Markinako erdigunera bueltan lasterbide gisa balioko duena.