IZURTZAko IBILBIDEAK

Ibilbide erraz honetan Elizaldeko ingurua ezagutuko dugu. Aparkalekutik hegoalderantz abiatuko gara BI-623 errepideko espaloitik. Industrialdera ailegatu baino lehen ezkerrera biratuko dugu, eta oinezkoentzat eta bizikletantzat bidegorri batetik jarraituko dugu. Metro batzuk aurrerago, berriro ezkerraldera biratuko dugu Santo Tomas parkera abiatzeko. Hau gurutzatu eta hasierako puntura bueltatuko gara urbanizazio txiki bat inguratuz.

Ibilbide zirkular honek Izurtzako mendiak ezagutzera eramango gaitu. Frontoitik abiatuta, errepidea gurutzatu eta Santo Tomas parkeko norabidea hartuko dugu. Alde batera utzita, industrialdera jarraituko dugu, eta eskuinaldean utzita Etxano auzotik eta basoetatik ibiliko gara. Seinaleak jarraituko ditugu eta AHT ikustean ezkerraldera biratuko dugu, aparkaleku bat gurutzatuko dugu eta BI-623 errepidean sartuko gara hasierako puntura bueltatzeko.

Ibilbide zail hau frontoian hasten da, eta ibilbide berdeko bide berdina jarraituko dugu industrialdera ailegatu arte. Aurrera jarraituz Lexartzadorrera ailegatuko gara eta aldapan gora joango gara Abadiñoko lursailetara heldu arte. Ezkerrera biratu eta beheranzko bidean joango gara Etxanoko basoak gurutzatuz, eta ibilbide urdineko trazatuaren tarte bat konpartituz, hasierako puntura itzuliko gara Goikopalaziotik.

Oso zaila den ibilbide honetan Neberondo zonaldera igoko gara. Frontoitik abiatuko gara hilerriko norabidea hartuta. Ondoren, Bitaño auzora ailegatuko gara eta basabide batetik Neberondora igoko gara. Ondoren jeitsiera hasiko dugu, Etxaburu dorretik hurbil pasako gara, eta BI-623 hartuta Mañarian pixka bat sartuko gara. Ondoren ezkerrera biratuz buelta hasiko dugu, Lexartzatik pasatuz eta industrialdeko atzeko partetik ibilita. Santo Tomas zonaldera ailegatuko gara eta hasierako puntura itzuliko gara Goikopalaziotik.